22 Nov 2008

ဒါနဲ့ စကားမစပ် ...

စကားမစပ် ...
မနက်ဖြန် East London မှာ IC show ပွဲရှိတယ်။ မျိုးကြီး၊ အငဲ၊ ၀ိုင်ဝိုင်း၊ တင်ဇာမော်နှင့် IC အဖွဲ့သားများ ဖျော်ဖြေတင်ဆက်ကြမှာ ဖြစ်ပါတယ်။ IC show က ပြည်ပမှာတင်မဟုတ် ပြည်တွင်းမှာပါ ကြည့်ရခဲတဲ့ ပွဲတစ်ခုပါ။ ဒါပေမဲ့ အလုပ်ရှိနေတာရယ် စိတ်မပါတာရယ်ကြောင့် မသွားဖြစ်တော့ပါဘူး။ သူငယ်ချင်းတို့ရေ ... ဆောရီးပါကွာ။

စကားမစပ် ...
လွန်ခဲ့တဲ့လက မန္တလေး ၁၆ အထက ကျောင်းတုန်းက တစ်ခန်းတည်း အတူတူတက်ခဲ့တဲ့ ငယ်သူငယ်ချင်း တစ်ယောက်နဲ့ အပြင်မှာ (Holborn) ပြန်ဆုံခဲ့တယ်။ စကားတွေပြောရင်း အသက်ပြန်ငယ်သွားသလို ၁၆ကျောင်းကြီးကိုလည်း သတိရမိတယ်။ သူငယ်ချင်းကတော့ အရင်အတိုင်းပဲ ဘာမှ မပြောင်းလဲဘူး။ ငယ်ငယ်ကလို စာတော်မြဲပဲ။ အခုလဲ LSE မှာ Economic and Economic History ကို Master ဖတ်နေတယ်။ သူတင်မဟုတ်ဘဲ သူ့ညီကလဲ ဒီနှစ်ထဲမှာပဲ King College ကို ၀င်ခွင့်ရတယ်။ သူအစ်မကတော့ Imperial ကနေ ကျောင်းပြီးထားပါတယ်တဲ့။ ကျွန်တော် သူတို့ မောင်နှမသုံးယောက်လုံးကို အရမ်းလေးစား အားကျသွားတယ်။ သူကတော့ Master မှာ စာတွေ ဖတ်ရလွန်းလို့ ငြီးနေလေရဲ့။

စကားမစပ် ...
စင်ကာပူမှာ Electronic နဲ့ အလုပ်လုပ်နေတဲ့ ၁၆ ကျောင်းက သူငယ်ချင်းတစ်ယောက်နဲ့လည်း အွန်လိုင်းမှာ အကြာကြီး ဆုံဖြစ်ခဲ့တယ်။ တစ်ခန်းတည်း မဟုတ်ပေမဲ့ အခန်းချင်းက ကပ်ရပ် ပညာသင်ခဲ့ကြတယ်။ ဆယ်တန်းပြီးကတည်းက စလုံးကိုရောက်နေခဲ့တဲ့ သူ့ရဲ့အတွေ့အကြုံတွေကို အခြေခံပြီးပြောပြတဲ့ စလုံးရဲ့ အခြေအနေအရပ်ရပ်ကို သိခွင့်ရခဲ့တယ်။ ငယ်သူငယ်ချင်းတစ်ချို့ရဲ့ ဓာတ်ပုံတွေကိုလည်း ကြည့်ခွင့်ရခဲ့တယ်။ အရာအားလုံးအတွက် ကျေးဇူးပါ သူငယ်ချင်း။

စကားမစပ် ...
Europe တ၀ိုက်မှာရှိတဲ့ ရံသီ အမည်ပါတဲ့ ဘုန်းတော်ကြီးကျောင်းများအတွက် ၂၀၀၉ ခုနှစ် ပြက္ခဒိန်ကို စပြီး လုပ်ဆောင်နေပါပြီ။ မြန်မာပြက္ခဒိန်တွေကို တကူးတက scan ဖတ်ပြီးပို့ပေးတဲ့ သူငယ်ချင်း မြတ်စိုးငြိမ်းကို အထူးကျေးဇူးတင်ပါတယ်။ လန်ဒန် Colindale မှာရှိတဲ့ ဘုန်းတော်ကြီးကျောင်း၏ အမည်ကတော့ သာသနာ့ရံသီ ၀ိဟာရ ဖြစ်ပြီး ကျောင်းထိုင်ဆရာတော်ကတော့ ဦးဥတ္တရဖြစ်ပါတယ်။ အခုလက်ရှိ ဆရာတော်အပါအ၀င် ဘုန်းဘုန်း လေးပါး သတင်းသုံးနေထိုင်လျှက်ရှိပြီး Europe တစ်ခွင် သာသနာတော် ပြန့်ပွားရေးနှင့် မြန်မာဘုန်းတော်ကြီးကျောင်းများ ပေါ်ပေါက်လာရေးအတွက် ကြိုးစားဆောင်ရွက်လျက်ရှိပါတယ်။

စကားမစပ် ...
ကျွန်တော့်ဘလော့ရဲ့ side bar မှာ ဒီဇင်ဘာ သို့မဟုတ် ဆောင်းရာသီနှင့် ပက်သက်တဲ့ သီချင်းတွေကို လက်လှမ်းမှီသလောက် စုစည်းပေးထားပါတယ်။ နားဆင်နိုင်သလို Download လည်း လုပ်ယူနိုင်ပါတယ်။ ဒီဇင်ဘာနှင့် ပက်သက်သော သီချင်းများ သို့မဟုတ် List ထဲတွင် မပါဝင်သေးသည့် သီချင်းများရှိခဲ့ရင်လည်း Cbox မှာ လက်တို့ပြီး ပြောထားခဲ့နိုင်ပါတယ်။

စကားမစပ် ...
အခုတလော ဖုန်း၊ အီးမေးလ်၊ အွန်လိုင်းမတ်စိ၊ အော့ဖ်လိုင်းမတ်စိများ မပြန်ဖြစ်ပါက သီးခံခွင့်လွှတ်ပေးကြပါ။ အချိန်တစ်ခုကိုရောက်မှ တောင်းပန်စာနှင့်တကွ ပြန်လည်ဆက်သွယ်ပါမည်။ အခြားတစ်ဘက်မှာလည်း စိတ်ထွက်ပေါက်ဖြစ်တဲ့ ဒီဘလော့လေးမှာတော့ ပို့စ်တွေနှင့် ပုံမှန်လှုပ်ရှား အသက်ဝင်နေပါလိမ့်ဦးမည်။

No comments:

Post a Comment

Thanks for your comment.